Poslovne vijesti - Makedonija

Туристички зони во Охридско-струшкиот, Преспанскиот и Дојранскиот регион

Владиниот Комитет за туризам ја разгледа Националната стратегија за развој на туризмот со посебен акцент на формирање работна група која ќе се концентрира на делот на формирање и создавање развојни туристички зони во три региони - Охридско-струшкиот, Преспанскиот и Дојранскиот.

Работната група што ќе ја сочинуваат претставници од министерствата за економија и за транспорт и врски и од Агенцијата за промоција и поддршка на туризмот, како што информира министерот за економија, Ваљон Сараќини, наредната недела треба да има состанок.

На Комитетот било разговарано во иднина да се реформира досегашната Агенција за промоција и поддршка на туризмот во нова Национална туристичка агенција која ќе има цел да го промовира туризмот и едукација на туристичките работници.

Според него било разговарано и за можноста следната година повторно да бидат воведени субвенции за носење странски туристи и бил потенциран фактот дека годинава имало за 25 отсто зголемување на бројот на странски туристи.

- На Комитетот разговаравме и за податокот што го добивме деновиве, а тој говори дека бројот на нововработени, само во делот на туризмот, е зголемен за 40 проценти во однос на истиот период лани. Владата на РМ става посебно значење на развојот на туризмот, а тоа го покажа со последните информации дека девизниот прилив во државата се зголемил за околу 19 отсто, што од прилика значи околу 100 милиони долари прилив - нагласи Сараќини.